核心疫苗：三合一（FVRCP）

  • 貓瘟（泛白血球減少症）：劇烈嘔吐腹瀉、白血球急降，幼貓死亡率極高
  • 貓鼻氣管炎（疱疹病毒）：貓感冒、眼睛發炎，終身帶毒
  • 杯狀病毒：口腔潰瘍、流口水、肺炎

幼貓時間表

年齡疫苗
8 週第一針三合一
12 週第二針三合一
16 週第三針三合一（同時可打貓白血病）
1 歲加強針
之後每 1 至 3 年一次，視乎疫苗及生活方式

成年貓如果從未打針，打兩針相隔 3 至 4 週，之後每年或每三年加強。

非核心疫苗

  • 貓白血病（FeLV）：會出街、住貓露台或同來歷不明貓隻同住嘅貓建議接種；接種前先做血液測試。
  • 貓愛滋（FIV）：香港冇疫苗，預防靠留在室內同絕育減少打架。
  • 狂犬病：貓喺香港冇法定要求，出境時部分國家需要。

室內貓要唔要打

要。貓瘟病毒喺環境可以存活一年，經鞋、衣物、雙手帶入屋；貓舍、美容、住院都要求有效疫苗。室內貓一般只需核心三合一。

打針前後

  • 打針當日貓要健康，打噴嚏、流鼻水、腹瀉要延後。
  • 留院 20 至 30 分鐘觀察。
  • 48 小時內可能輕微疲倦、食少啲；面腫、嘔吐、呼吸急促請即致電。
  • 針口偶爾會有小硬塊，通常一個月內消退；超過三個月或變大要檢查。

錯過咗加強針

補一針即可，唔使由頭開始。帶舊紀錄卡嚟，我哋按情況安排。

本院安排

幼貓套餐包括三針三合一、杜蟲、驅蚤同身體檢查，可同時植入晶片。預約時提供書面報價。